Faatinoga a le Malo mo Fuafuaga mo le Matua Taualoa (Samoan)
O le Fuafuaga mo le Matua Taualoa ua fa'ailoa ai fa'amoemoega o le Malo mo se si'omaga e mafai ona soifua matutua ai tagata ma le taualoa, ia fa'atauaina tagata matutua, ma ia maua pea o latou avanoa e a'afia ai i mea fai. O le naunauta'iga o lenei Fuafuaga ia mautinoa le lagolagoina e aiaiga a le Malo o lenei faamoemoe.
Ua fa'atutuina e le Fuafuaga mo le Matua Taualoa sini e sefulu mo fa'atinoga a le malo. Ua taula'i sini e sefulu 'ina ia fa'ateleina avanoa i le tele o itu mo tagata matutua. E aofia ai sini mo tupe maua mautu, fesoasoani e faigofie ona maua, atiina'ega o le tagata lava ia ma le 'ave'esea o faiga fa'atapula'a o tausaga.
Ua naunauta'i le Malo e fa'alaua'tele le taua ma le sao o tagata matutua i nu'u ma mafutaga. O tagata matutua o sui taua i nu'u ma mafutaga ma ua i ai le aia tatau e taualoa ai i latou i le pulapula-la-goto o lo latou soifua. Ua i ai o latou tomai, atamai, ma silafia e fai ma sao i o latou si'omaga ma e tusa ai ma maitauga i le fa'ato'ateleina o tagata matutua i le isi ta'i sefulu tausaga, o le a 'avea o se isi alaga'oa mo Niu Sila. O le fa'aaogaina pea o le tagata i le matua o lona soifua e aoga mo ia lava, mo le 'a'ai, fa'apea le atunu'u atoa.
Ua sapaia e le talitonuga o le Matua Taualoa ni mea taua e aofia ai le soifua maloloina, tupe mautu, olaga tuto'atasi, loto fa'amalieina, agaga mo nu'u ma mafutaga, malu puipuia o le tagata, ma le si'omaga fa'ale-tino. O lona uiga o le 'avea ma tagata matua e ao ona va'ai i ai o se taimi lelei. E le na o le olaga o tagata matutua e fia fa'ataua ae fa'apena fo'i ona fa'ataua uiga, manatu ma gaioiga a so'o se tagata aga'i i le olaga matua ma tagata matutua. O le fa'alaua'iteleina o uiga lelei e fa'atatau i le soifua matua, o le ulua'i laasaga lea mo le fa'ataunu'uina o lenei sini. O aiaiga mo le Matua Taualoa e fa'atatau lea i le fa'aleleia atili o le soifuaga o le tagata ma le fa'atupuina o se si'omaga e fia 'auai ai pea i mea fai.
O aiaiga mo le Matua Taualoa ua fausia mo le lagolagoina o tagata, a o fa'asolo 'ina matutua i latou 'ina ia soifua aoga mo le tamao'aiga ma mafutaga ua i ai. E taua i aiaiga a le Malo i le lautele o mata'upu - e aofia ai avanoa faigaluega, soifua maloloina ma le lagolago tau tupe maua - ona alia'e ai fa'atagaga ma fa'amalosiga i tagata matutua ma e matutua i le lumana'i, ia soifua taualoa ma aoga i o latou tausaga matua.
O le faamoemoega o lenei Fuafuaga 'ina ia atiina'e se 'auivi ma fa'atinoga e fa'alaua'itele ma lagolago ai le soifua matua taualoa, i totonu o aiaiga ma atiina'ega o 'au'aunaga i le lautele o matagaluega a le Malo.
O Sini o le Fuafuaga mo le Matua Taualoa
O sini e 10 o le Matua Taualoa na atiina'e e ala i feutaga'iga ma tagata matutua o le atunu'u lautele. Ua atagia ai itu taua na maitauina mo le fa'aleleia o avanoa o le 'auai o tagata matutua i mea fai a nu'u ma mafutaga i ala ua latou filifilia. O sini nei:
- Ia mautu tupe maua talafetaui mo tagata matutua.
- Ia tutusa, vave ona maua, taugofie ma faigofie ona maua fesoasoani tau le soifua maloloina mo tagata matutua
- Ia lelei ma taugofie itu'aiga fale 'ese'ese mo tagata matutua.
- Ia taugofie ma faigofie ona maua ala femalagaa'i 'ese'ese mo tagata matutua.
- Ia malu puipuia, mautu ma mafai ona soifua matua taualoa i nofoaga ua alaala ai.
- Ia maua 'au'aunaga tatau 'ese'ese fa'ale-aganu'u e filifili i ai tagata matutua.
- Ia faigofie e tagata matutua i nu'u i tua ona maua fesoasoani.
- Ia a'oa'oina manatu o tagata 'uma e le leaga le soifua matua po o tagata matutua.
- Ia 'ave'esea le fa'atulagaga o tausaga ae fa'amuamua faiga fesuisuia'i e filifili i ai mo galuega.
- Ia fa'ateleina avanoa mo le atiina'ega o le tagata lava ia ma lona 'auai i mea fai a nu'u ma mafutaga.
