The Beehive building

Ngā aratohu Puakanga Takohanga

English translation | Te Reo whakamaori


He tino hira ki Te Manatū Whakahiato Ora (te Manatū) te haumarutanga me te tūmataitinga o ā mātau mōhiohio. Mēnā ka kitea e koe he raruraru haumarutanga me ā mātau pūnaha, me kōrero mai kia pai ai te whakatika.

Te puakanga o ngā raruraru haumarutanga pūnaha

He mea nui ki a mātau ngā whakaaro mai i te hapori. Ka āwhina te puakanga o ngā raruraru haumarutanga i roto i ā mātau pūnaha i ā mātau ki te whakaū i te haumarutanga me te tūmataitinga o ā mātau mōhiohio.

Mēnā kua kitea e koe he raruraru haumarutanga i roto i ā mātau pūnaha, ka mahi tahi tō mātau rōpū Haumarutanga IT me koe ki te whakatau me te whakatika.

Kāore koe e kōkirihia ki te ture, te aukati, te whakakore rānei i tō urunga atu ki ngā ratonga a te Manatū ina whai koe i ēnei aratohu ina whakamōhio mai koe i te raruraru ki a mātau.

Ka rāhuitia e te Manatū ōna motika ture katoa ki te kore koe e whai i ngā aratohu Puakanga Takohanga.

Ngā aratohu Puakanga Takohanga

He mea whakairo ēnei aratohu hei āwhina i a koe me te Manatū ina kitea he raruraru haumarutanga i roto i ā mātau pūnaha. Mēnā kei te whakamātau koe i te haumarutanga, me:

  • whakapau kaha kia kaua e:
    • takahia te tūmataitinga o te tangata
    • mahia tētahi mahi e pōturi ai te pūnaha mō ngā kaiwhakamahi
    • whakararuraru i ngā pūnaha whakaputaranga
    • tūkino raraunga
  • mahi ngā rangahau i roto anake i te whānuitanga kua whakatauhia i raro
  • muku, ā, kaua rawa ngā mōhiohio matatapu a te Manatū, ngā mōhiohio whaiaro rānei i riro i a koe e tuari
  • me wawe tonu te īmēra atu ki it_security@msd.govt.nz ki te whakamōhio atu i ngā raruraru haumarutanga i roto i ā mātau pūnaha ina kitea e koe
  • noho matatapu ngā mōhiohio ka kitea e koe e pā ana ki ngā raruraru haumarutanga i roto i ā mātau pūnaha ki a koe me te Manatū, kia whai wā mātau ki te whakatika.

Tō mātau Paiherenga ki a koe

Ki te whai koe i ēnei aratohu Puakanga Takohanga ina whakamōhio mai koe i tētahi raruraru ki a mātau, e paihere ana mātau:

  • kia pono, kia kaha te whakawhitiwhiti kōrero ki tērā e taea ana
  • kia noho matatapu ngā mōhiohio ka tukuna mai e koe i roto i te Manatū me ā mātau kaiwhakarato, engari anō mēnā me whakapuaki e mātau i te mea:
    • ka kitea e tētahi rōpū kē te raruraru haumarutanga i roto i tā mātau pūnaha i mua tā mātau whakatikanga, tērā rānei
    • ka whakamahia rānei ngā mōhiohio mō te raruraru haumarutanga i roto i tā mātau pūnaha hei takahi i te tūmataitinga, ā, e herea ana te Manatū ki te whakarite i te takahitanga i raro i te Ture Tūmataitinga 1993.
  • kia kaua e kōkiri i a koe ki te ture e pā ana ki tō rangahau engari me whai koe i ngā aratohu Puakanga Takohanga, ka tiakina e koe ngā mōhiohio kia noho matatapu, ā, kāore e whara/whakararu ratonga a te Manatū
  • kia mahi tahi me koe kia mārama, kia whakaritea wawetia te raruraru (tae atu ki te whakamanatanga tuatahi o tō whakamōhiotanga i roto i te whitu rā o te tāpaetanga)
  • ka āhukahukatia pea e mātau tō takoha mā tētahi reta whakamihi mēnā nāu te whakamōhiotanga tuatahi mai mō te raruraru, ā, ka oti i a mātau tētahi huringa tikanga, whirihoranga rānei mō te raruraru.

Kei Roto

  • msd.govt.nz
  • mymsd.govt.nz
  • www.workingforfamilies.govt.nz

Kei Waho

Kāore ngā ratonga e taurimatia ana e ngā kaiwhakarato rōpū kē, kaihoko rānei i roto i tēnei. Kāore ētahi atu tari kāwanatanga, kaiwhakarato rānei me ngā ratonga i roto i tēnei.

Mō ngā raruraru e whakaawe ana i ētahi atu tari kāwanatanga, kaiwhakarato rānei, me whakapā atu koe ki CERT NZ, he ratonga tuku pūrongo ingoa huna tā rātau mō ngā raruraru haumarutanga pūnaha.

Hei tiaki i ā mātau kaiwhakamahi, kaimahi, te Ipurangi katoa, me koe hoki, kei waho ngā momo whakamātautau i tēnei:

  • Ngā kitenga mai i ngā whakamātautau ā-tinana pērā i te urunga ki ngā tari (hei tauira, ngā kūaha tuwhera, whai tata rawa)
  • Ngā kitenga ka ahu mai i ngā raweketanga pāpori (hei tauira, hītinihanga, tāhae mōhiohio hira)
  • Ngā kitenga mai i ngā taupānga, pūnaha rānei kāore i tuhia ki te wāhanga 'Kei Roto'
  • Ngā iro UI me te UX me ngā takikupu hē
  • Ngā ngoikoretanga o te Network level Denial of Service (DoS/DDoS)
  • Te tūkinotanga, whakahāmate rānei (ngā whakamātau rānei ki te whakakore, hāmate rānei) i ngā raraunga, mōhiohio rānei a te Manatū. Kei roto i ēnei ko ngā mōhiohio pea e hāngai ana ki a koe.

Me pēhea tō tuku pūrongo mō tētahi raruraru haumarutanga?

Mēnā e whakapono ana koe kua kitea e koe he raruraru haumarutanga i roto i tētahi o ā mātau hua, pūhara rānei me tuku mai e koe mā te īmēra ki it_security@msd.govt.nz. Kia mārama te tuhi i te pūrongo ki te reo Ingarihi, me te whakauru i ngā taipitopito e whai ake:

  • Te momo raruraru haumarutanga
  • I pēhea tō kite i te raruraru haumarutanga
  • Mēnā kua whakaputaina te raruraru haumarutanga, kua tuaritia rānei me ētahi atu
  • Ngā whirihoranga kua whakaawetia
  • Te putanga, ka taea rānei te puta o ngā mōhiohio whaiaro
  • He whakaahuatanga o te tauwāhi me te pānga ka taea mai i te raruraru haumarutanga
  • He whakaahuatanga āmiki o ngā upane me whai hei whakaputa anō i te raruraru, mōrea rānei (He tino āwhina ki a mātau ngā whakaaturanga o ngā hōtuhi ariā, topengamata, me ngā hopukanga mata kōpeke)
  • Tō ingoa/ingoa tukutuku kia whakamanatia i roto i tā mātau Whare Toa.

Mēnā e hiahia ana koe ki te whakamuna i ngā mōhiohio, me whakamahi i tā mātau kī GPG, 0x4FF711A8795E7887 ka kitea tuihonotia i https://pgp.mit.edu/pks/lookup?op=get&search=0x4FF711A8795E7887

He mea tuhi ngātahi tēnei kaupapahere puakanga mōhiohio me ngā aratohu a te NZITF Coordinated Disclosure me ngā aratohu kaupapahere puakanga a Disclose.io.

The Beehive building
Print this page.